Jone Kvie sine to himmellekamar prydar Cinemateket
Sterke krefter møtast i Jone Kvie sine lysande, bronsestøpte himmellekamar som svevar over publikum på Cinemateket. Det er KORO (Kunst i offentleg rom) som har kuratert kunstverket i samband med nyopninga tidlegare i år.
![Gulfarget bronseskulptur som ligner på et himmellegeme i forgrunnen. I bakgrunnen en hvit rund kule. Begge henger fra taket.](https://cin.imgix.net/images/Fra-Cinemateket/Stellar-Core-II-foto_Ruben_Ratkusic-lowres.jpg?auto=format%2Ccompress&cs=srgb&fit=clip&fm=jpg&q=90&w=600&s=0425a7d3bea38d42f5295f2c3315bd74 600w, https://cin.imgix.net/images/Fra-Cinemateket/Stellar-Core-II-foto_Ruben_Ratkusic-lowres.jpg?auto=format%2Ccompress&cs=srgb&fit=clip&fm=jpg&q=90&w=800&s=7733d262687465d6f3ddb0bd4ac6f4a0 800w, https://cin.imgix.net/images/Fra-Cinemateket/Stellar-Core-II-foto_Ruben_Ratkusic-lowres.jpg?auto=format%2Ccompress&cs=srgb&fit=clip&fm=jpg&q=90&w=1000&s=2ca09e31bfe5e1168a4b92720121fff3 1000w, https://cin.imgix.net/images/Fra-Cinemateket/Stellar-Core-II-foto_Ruben_Ratkusic-lowres.jpg?auto=format%2Ccompress&cs=srgb&fit=clip&fm=jpg&q=90&w=1200&s=cd37ccddcc2865f480cfecf366b72590 1200w, https://cin.imgix.net/images/Fra-Cinemateket/Stellar-Core-II-foto_Ruben_Ratkusic-lowres.jpg?auto=format%2Ccompress&cs=srgb&fit=clip&fm=jpg&q=90&w=1400&s=29cb1bfb525397f1d18f7603e62e8464 1400w, https://cin.imgix.net/images/Fra-Cinemateket/Stellar-Core-II-foto_Ruben_Ratkusic-lowres.jpg?auto=format%2Ccompress&cs=srgb&fit=clip&fm=jpg&q=90&w=1600&s=bd84f5a74fc9957b1f47eee933cc65ed 1600w, https://cin.imgix.net/images/Fra-Cinemateket/Stellar-Core-II-foto_Ruben_Ratkusic-lowres.jpg?auto=format%2Ccompress&cs=srgb&fit=clip&fm=jpg&q=90&w=1800&s=50871707bd0628014f8af2722e5dbf66 1800w)
Foto: Ruben Ratkusic.
I 1986 eksploderte romferja Challenger over Atlanterhavet, berre 73 sekund etter å ha forlate bakken. Oppskytinga blei vist direkte på fjernsyn, og gjorde djupt inntrykk på den då 15 år gamle Jone Kvie. I dag er verdsrommet og mysteria kring ein viktig del av kunstnarskapet hans. Det same gjeld film; Kvie lar gjerne eit bakgrunnsobjekt eller ei stemning frå ein film få eit konkret utløp i verka sine. Hans drivkraft som kunstnar blir gjerne omtalt som eksistensialistisk. Kva betyr det å vere menneske i verda?
Bronseskulpturane svevar i rommet som lysande objekt i kinomørket. Dei heng saman, men representerer ulike fenomen. 70 kilo tunge Stellar Core II er basert på bilete og målingar av dei kraftige prosessane som heile tida føregår i stjernene. Energien som blir forløyst imellom anna solstormar er visualisert ved at profane objekt som ballongar, avispapir og pappmasjé er plasserte utanpå det kuleforma sentrumet til skulpturen. Medan dei leikne formene i Stellar Core II er gitt av indre prosessar i kjernen til stjerna, blir den mindre, månelignende Lunar body (event) treft av krefter utanfrå. Forma blir forandra av den ytre påverknaden frå ein annan himmellekam. Saman gjer skulpturane forsøket på å forstå det ukjende fysisk form. Dei er enkle å lese, samtidig som dei opnar for at betrakteren kan fylle inn ei eiga historie.
Kunstnaren Jone Kvie
Jone Kvie (f. 1971) er utdanna ved Kunstakademiet i Oslo, og bur og arbeider i Napoli og Berlin. Han har stilt ut ved mellom anna AROS Kunstmuseum i Århus, Nasjonalmuseet og Kunstnernes Hus i Oslo og Bergens Kunstmuseum, og dessutan galleri over heile verda. I 2022 deltok han på den 15. utgåva av Documenta i Kassel.
Faktaboks
Adresse: Norsk filminstitutt/Cinemateket, Dronningens gate 16, 0152 Oslo
Fylke: Oslo
Kunstnar: Jone Kvie
Ferdigstilt: april 2024
Fagkomité: Camilla Løw, Robert Johansson og Eli Skatvedt (hausten 2021)
Prosjektansvarleg i KORO: Elisabeth Tetens Jahn og Anna Katharina Haukeland
Program: Kunst til leigebygg og eldre statsbygg (LES)